Mbyllet me sukses ACSF, panairi më i madh dedikuar talentit të të rinjve

Panairi më i madh dedikuar talentit dhe aftësive të të rinjve, “ALBANIAN CENTRAL STEAM FAIR

2023(ACSF)” bëri bashkë qindra nxënës të talentuar nga shkolla të ndryshme të Shqipërisë së mesme, duke i dhënë mundësinë të prezantojnë projektet e tyre.

Komisioni i vlerësimit i përbërë nga profesorë të nderuar të Universitetit Barleti, vëzhgoi me kujdes çdo projekt pjesëmarrës dhe në fund të eventit përzgjodhi dhjetë projektet më të mira.  

Gjithashtu organizatori dhe moderatori i aktivitetit, z. Erion Muca, i dha lajmin e mirë nxënësve të përzgjedhur se do të të marrin pjesë në konkursin final NATIONAL STEAM FAIR 2023 në Prill 2024. Z. Muca falenderoi të gjithë pjesëmarrësit dhe theksoi se fitues janë të gjithë, pasi projekti i secilit ka vlerë të cmuar.

Pasioni dhe dëshira e nxënësve për të sjell projekte të ndryshme bëhet motiv për më shumë aktivitete të tilla promovuese si një pikë takimi me vlerë për promovimin e talenteve të nxënësve dhe maturantëve, dhe mbështetjen e tyre për të zhvilluar aftësitë, njohuritë, prirjet dhe talentin jo vetëm në plan kombëtar, por edhe ndërkombëtar përmes filozofisë së STEAM.

Aktiviteti u zhvillua më 16.12.2023 në ambientet e Universitetit Barleti, me një hapësirë të dedikuar dhe përkushtim maksimal për cdo pjesëmarrës.