Shëndeti për të gjithë, maturantët njihen me teknikat infermierore

Sot, në ambientet e Universitetit Barleti, u zhvillua një sesion i veçantë mbi teknikat infermierore. Klubi i Talentit i përbërë nga të rinj nga gjimnazet e Tiranës dhe Klubi i Mjekësisë i Universitetit, patën mundësinë e njohjes me teknikat infermierore të rëndësishme.

Pedagogët e fushës së infermierisë, përcollën me kujdes aktivitetin, duke prezantuar teknika si matja e shenjave vitale. Pjesa kryesore e aktivitetit përfshiu matjen e tensionit, glicemisë, pulsit, evidentimin e grupit të gjakut, dhe shumë të tjera. Të rinjtë e ftuar morën pjesë aktive në mësimin e këtyre teknikave duke i praktikuar ato në raste të thjeshta, duke krijuar një njohje më të mirë të procedurave infermierore themelore.

Ky event ishte i hapur për maturantët e interesuar për fushën e infermierisë, të cilët patën rastin të bënin pyetje dhe të merrnin përgjigje nga stafi me përvojë të gjatë në këtë fushë dhe pacientët tanë të rastit, të cilët ishin studentë të degeve të tjera universitare.

Aktiviteti ndihmoi në ndërtimin e një lidhjeje të ngushtë midis shkencës teorike dhe praktikës së infermierisë. Në përfundim, pjesëmarrësit u inkurajuan të shprehin vazhdimisht interesin e tyre për fushën e shëndetësisë dhe teknikat infermierore.

Universiteti Barleti mbetet i përkushtuar në ofrimin e një mjedisi të pasur mësimor dhe trajnues për studentët, duke përgatitur një brez të ri të profesionistëve të shëndetësisë me njohuri dhe aftësi të thella në fushën e infermierisë.