KUJDESI FARMACEUTIK: ROLI I FARMACISTIT NË FARMACITË E RRJETIT TË HAPUR NË KËSHILLIMIN SHËNDETËSOR TË PACIENTIT

Sipas Federatës Ndërkombëtare Farmaceutike (FIP)  −  “Misioni i praktikës së farmacisë është të ofrojë barna, produkte dhe shërbime të tjera të kujdesit shëndetësor që të ndihmojë njerëzit dhe shoqërinë për t’i përdorur sa më mirë ato”.Kujdesi farmaceutik është një filozofi e praktikës farmaceutike në të cilën pacienti është përfituesi kryesor i veprimeve të farmacistit. Kujdesi farmaceutik nënkupton punën e trajtimit të nevojave të lidhura me barnat e pacientit. Përfshirja e një farmacisti klinik në vendin tonë në këtë drejtim ka qenë e rrallë dhe e kufizuar,  në kundërshtim me prirjet në vendet e zhvilluara. Brenda ekipit të profesionistëve të kujdesit shëndetësor,  farmacistët  klinikë  të  trajnuar  do  të  kishin  njohuri  të  përshtatshme  dhe  aftësi  të përshtatshme për të parandaluar, zbuluar, monitoruar dhe zgjidhur problemet e lidhura me mjekësinë. Ndërsa publiku kërkon më shumë informacion mbi barnat dhe efektet e tyre, për të marrë vendime më të informuara, farmacistët duhet të marrin një rol më proaktiv në këshillimin e pacientëve. Marrëdhënia themelore në kujdesin farmaceutik është shkëmbimi i ndërsjellë, në të cilin pacienti i jep autoritet ofruesit dhe ofruesi jep kompetenca dhe angazhim (pranon përgjegjësinë).Në gjysmën e parë të viteve 1990 Helper dhe Strand futën konceptin e kujdesit farmaceutik. Kjo lëvizje vendoste farmacistin për herë të parë si një person kyç të ekipit shëndetësor, me përgjegjësi konkrete në rezultatet e trajtimeve mjekësore.Ne Shqipëri këto zhvillime të rëndësishme në përgjithësi erdhën pas viteve 2000.

Në vitin 2014 OBSH publikoi atë që njihet si “Koncepti i farmacistit me 7 yje”

Ndër këto role të reja të farmacistit mund të përmendim:

1. Përkujdesës: Farmacistët duhet të sigurohen që pacientët të marrin një trajtim cilësor dhe ta shohin veten si pjesë përbërëse e gjithë sistemit të përkujdesit shëndetësor.
2. Vendimmarrës: Hartimin e procedurave dhe marrjen e vendimeve të rëndësishme rreth aplikimit të tyre.
3. Informues: Ka një rol kyç në informimin e pacientit sepse në të shumtën e rasteve është i pari që përballet me të, por gjithashtu në informimin e hallkave të tjera të zinxhirit shëndetësor.
4. Menaxher: Tashmë, sidomos në pozicione të caktuara, farmacisti duhet të jetë i aftë teknikisht për të përballuar procese të ndryshme ekonomike, juridike, prodhimi, shpërndarjeje, etj.
5. Student i përjetshëm: E pamundur të ndalësh së mësuari sepse nga momenti në moment mund të ndodhin ndryshime dhe përmirësime të mëdha në fushën e farmaceutikës.
6. Mësues: Është përgjegjësi njerëzore dhe profesionale që një farmacist të asistojë dhe të kontribuojë në mënyrë aktive në procesin e formimit të brezave të ardhshëm.
7. Drejtues: Tingëllon e çuditshme, por është e vërtetë që farmacisti duhet të ketë tipare të drejtuesit në përgjithësi, e sidomos në raste kur është drejtues dhe ka për detyrë ndërmarrjen e politikave të rëndësishme në fushën e shëndetësisë.